Nie net 'n boom nie... 'n hele woud het geval

- Clem Marais wat 15 jaar die sinodale kantoor met dr Jan Woest gedeel het skryf:

Thijs meld dat 'n groot boom geval het toe hy hartseer kennis gee van Jan Woest se oorlye.

Dit voel vir my of 'n hele woud uitgewis is.

In my lewe het ek nog min mense teëgekom wat met so 'n deurleefde teologie geleef het soos Jan Woest. Toe sy leefwêreld in 2019 skeef loop as gevolg van onder meer 'n versengende droogte, was die berustende gelatenheid waarmee hy homself in die Hand van God geplaas het, opvallend. Jan het die genade verstaan, en hy het daaruit geleef. 

TEOLOOG

Jan was 'n formidabele teoloog wat die vermoë gehad het om inligting uit verskeie bronne geordend saam te bring ten einde lig te werp op 'n bepaalde uitdaging. En tog was hy die nederigheid self. Tot satwordens toe het hy tentatiewe woorde gebruik om sy insette te verduidelik. Ek het hom dikwels gevra om tog meer stellig te wees; jy weet mos waarin jy glo, sou ek sê. Hoeveel keer het ek dan nie uit sy mond gehoor nie: "Clemma, hieroor moet ons nog 'n bietjie dink. Ons weet nog nie genoeg nie!" 

Dit was sy deurleefde teologiese insig wat God gebruik het in die Ned Geref Kerk. Op Algemeen Sinodale vlak het hy baanbrekende bydraes gelewer op die gebied van veral die etiek. Wie sy skryfstyl geken het, vind sy formulerings terug in menige verslae van die Taakspan vir Aktuele Sake. Dat sy (ewe formidabele) kollegas in die Taakspan so dikwels ingekoop het op sy formulerings, is 'n getuigskrif opsigself. Sy spore lê ook diep en deeglik getrap op die gebied van teologiese opleiding en predikante-sake.

HY HET GEGLO GOD WERK DEUR GEWONE MENSE

In sy laaste maande het hy hard gewerk aan 'n proses wat gemeentes wou help om prosesmatig en in afhanklikheid voor God saam na te dink oor etiese uitdagings. Die proses sou aan die hand van gerigte vrae verloop, want, het Jan geglo, God se Gees werk ook deur gewone dissipels van die Here. Daarom het hy so 'n passie vir die plaaslike gemeente gehad.

Sy eie bediening het hy om die helfte in gemeentes (een in die Wes-Kaap en een in Namibië) en in diens van die sinodale verband deurgebring. Sedert 2004 het hy die roeping gehoor om die Namibiese NG-Kerk te begelei op 'n pad van vernuwing voor die Here. Vir Jan was hierdie nie net maar 'n oppervlakkige oefening waarin die "meubels" bietjie "anders gerangskik" moet word nie. Vir hom het vernuwing net op een plek begin, naamlik by 'n lewens-veranderende vernuwing van jou verhouding met God.

WYD BELESE MAAR GEïNTEGREERDE KENNIS

As verslaafde en toegewyde leser het hy boeke oor 'n wye spektrum verslind. Hoewel hy primêr 'n dogmatikus was, kon hy vanweë sy wyd belesenheid met gesag saam gesels oor die praktiese teologie. Juis sy uitsonderlike vermoë om verbande te trek tussen oënskynlik uiteenlopende bronne, het hom hier goed te staan gekom.

Sy een groot hartseer en kommer was die vlak teologie wat sommige gemeentes se bediening patroon ten grondslag lê. Maar, getrou aan sy eie deurleefde spiritualiteit, het hy nooit hieroor geskinder nie. As sy kollega in die kantoor het hy sy kommer wel dikwels teenoor my uitgespreek, maar nooit laat blyk wie of watter gemeente hy in gedagte het nie. Dat hy egter grond onder sy voete gehad het om so 'n waarneming te kan maak, is gewis. Hy was wyd oor Namibië betrokke by begeleiding van gemeentes.

BAANBREKER IN OPLEIDING

Teologiese opleiding was 'n ander passie wat Jan aan sy bors gekoester het. Hy was daarvan oortuig dat Namibië groter verantwoordelikheid sal moet aanvaar om hier te lande ook opleiding te gee. Die DEGNOS-opleidingsentrum te Grootfontein was 'n "baba" wat hy gekoester het. Saam met wyle ds. Hendrik van Zyl het hy ure spandeer aan die beplanning en uitvoering van opleiding vir San-sprekende lidmate in die noorde. Sedert veral die 2016-sinode van die Namibiese Sinode, was Jan die stimulasie agter die plaaslike Kuratorium se rol in die opleiding van Standplaas leraars en Gemeente bedienaars in Namibië.

PERSOONLIK

Waar ek Jan persoonlik baie geniet het, en ook veel by hom geleer het, was agter die Kanaal 7-mikrofoon. Hy was in die laaste jare 'n gereelde gas Onder die Kameelboom. Sy helder insig in God se Woord was nie net vir my tot seën nie, maar ook vir honderde luisteraars regoor Namibië. 

Toe Jan in 2004 vir die sinode begin werk het, het ek bietjie binnepret beleef. Hy was die dominee van die gemeente Leonard wat in die vroeë 1990's, toe ek as nuwe sinodale amptenaar 'n kursus aanbied vir dames wat in kerkkantore werk, sy kantoor-dame kursus toe stuur met die boodskap: moenie alles glo wat die sinode jou leer nie! Sy was stout genoeg om my daarvan te vertel en ek en Jan het later baie daaroor gelag. Daardie tyd het hy nie kon droom hou sou self 'n sinodale amptenaar word wat gemeentes probeer begelei nie!

Waar dit begin het... 

- Johannes Maritz jarelange kollega en vriend van Jan skryf:

Jan-hulle het 1993 ons land ingekom en op pad na Leonardville  by ons op Aranos gestop.  Hy het uit die motor geklim met ‘n hoed op sy kop. Hy het meer gelyk soos ‘n Kalahari-boer as ‘n teoloog uit die Kaap. Nederig en lief vir eenvoud.

In 2004 is hy as predikant in sinodale diens beroep om te help dat al ons sinodale prosesse  deeglik teologies gefundeer is. Daarin het hy uitstekend geslaag en nie net ons sinode nie, maar die hele NG Kerk op alle vlakke verryk met sy teologiese denke, fyn waarneming en goeie formulerings. Jan was een van die beste teoloë wat ons land nog opgelewer het. Hy was ‘n gawe van God aan die kerk.

Sy  uitgangspunt was altyd dat ons eers reg oor onsself en die kerk sal dink as ons God regtig ken vir wie Hy is. Jan wou mense help om met God te leef. Sy droom was om eendag ‘n retreatsentrum op te rig waar mense God kon ontmoet en leer om prakties met Hom te leef.

Die wonderlikste was egter om ‘n vriend en vertroueling van Jan te wees en te kon deel in sy eg menslikheid en die  rykdom van sy pad saam met ons Here.  Wat ‘n voorreg!

Op die foto bo wat in Leonard se kerk hang is die jong gesinnetjie afgeneem met die onderskrif: Ds J Woest 1993 - 2004. Op die foto onder staan Hanno Visser (links) en Jan by die 75 Jarige viering van die gemeente Leonard middel November verlede jaar.

KERKBODE NUUS

RUBRIEK: Dana onthou

“Die eerste hoeveel jaar van my lewe is afgemeet deur ’n kerkklok, uur vir uur vir uur. En naby soveel kerke in die land het ’n bordjie langs die straat gewaarsku: Kerk stilte.” | Lees Dana Snyman se jongste Kerkbode-rubriek hier

WEBDOKKIE: Karoo: Reën, seën en kommer

Jacobie M Helena en die videograaf Robert Cable doen verslag uit Britstown waar goeie reën vroeër vanjaar ná groot swaarkry geval het. Woord en video hier

 DANKOFFERDALING: “Praat reguit oor geld,” pleit prof 

Geen eredienste beteken geen tradisionele kollekte-opname nie, en talle NG gemeentes sien reeds die finansiële uitwerking op hulle boeke, wat ’n groot impak kan hê op organisasies wat op hulle beurt deur gemeentes ondersteun word, berig Jacobie M Helena in hierdie Kerkbode-nuusberig.

Maklik aflaaibare PDF’s teen slegs R40 elk

Gedurende die volgende vier weke gaan ons fokus op die Perspektiewe op die koninkryk-reeks. Hierdie reeks bestaan uit vier boeke met agt studies, of gespreksgeleenthede, elk. Elke gespreksgids gaan oor een spesifieke tema wat met God se koninkryk verband hou. Hierdie reeks daag gelowiges uit om elke dag met ’n nuwe perspektief te leef – ’n koninkryksperspektief. 

Boek 1 - ’n Koninkryk van genade

God het ’n genadeverbond met ons gesluit. Genade beteken ons kry wat ons nie verdien nie. Dit maak nie vir ons sin nie. Maar juis dít is die punt van genade: Genade is onverdiend en … God se koninkryk is vol van hierdie genade, onbeskryflik groot. Lees meer hier …

Hou ons volgende nuusbrief dop vir meer inligting oor Boek 2 in die reeks. Klik hier vir die volle reeks.